落選港姐借衫出席台慶事後疑整爛禮服反屈婚紗店拒作出賠償

GIRLAV · 發表於 2021-11-30 14:16:17

2020年落選港姐麥詩晴（Ceci）雖然喺參選時觀眾緣麻麻，仲畀人話佢瘦到肋骨凸出，腋下又有色素，但簽約TVB後獲得唔少機會，例如有份出演《愛•回家之開心速遞》飾演島大工商管理學系學生「智媛」、《欺詐劇團》及正拍攝新劇《隱形戰隊》，台慶當晚亦有份表演；不過近日有婚紗店斥責一名女藝人借禮服後唔單只整爛咗件衫，仲反指婚紗店屈佢，拒絕作出賠償，而疑兇正正就係麥詩晴。

麥詩晴喺台慶當晚總穿著兩套禮服，一套係黑色表演服，另一套就係純白婚紗；麥詩晴本身分別將兩個造型分享至IG，仲問網民中意邊個look多啲：「你哋覺得型格全黑ge style 襯我多啲定係純白style呢？ Btw感恩今次有表演嘅機會，感謝所有台前幕後每一位嘅付出，付出必然會有收穫嘅！」不過之後卻刪除咗白色禮服嗰張相。事關，有婚紗店指出經朋友介紹借咗一件全新拆袋，連相都未有時間影嘅禮服畀一位女藝人出席活動，但還衫後發覺件衫穿咗個大窿，該女藝人曾道歉並承諾賠償，但翌日卻反口唔認，仲話係婚紗店屈佢。

婚紗店亦分享涉事女藝人照片，雖然用上文字遮住樣貌，但照片明顯同麥詩晴日前上傳嘅嗰張係一模一樣。婚紗店直言信錯咗嗰名女藝人，仲表示全新裙咁就報銷咗，只換嚟一張贊助相，仲叫行家們小心。