犀利！夏蘭特復出7分鐘即入靚波

joemalee · 發表於 2021-11-28 20:46:04

養傷超過一個月嘅艾寧夏蘭特終於喺周六(27日)晚德甲復出，佢後備上陣後僅7分鐘，就射入靚波，不愧為新一代入球機器，並協助多蒙特作客以3比1反勝禾夫斯堡，繼續以1分之微力逼榜首拜仁慕尼黑。

開賽僅2分鐘，多蒙特就失守，被禾夫斯堡前鋒韋格賀斯近門頂入，不過「蜜蜂兵團」企穩陣腳之後，逐漸搶回主導權，並喺35分鐘博到12碼，由安利簡恩主射入網扳平。

換邊之後冇耐，當耶爾馬倫喺禁區頂遠射入網，幫多蒙特反超前2比1。踢到73分鐘，球迷最期待畫面出現，艾寧夏蘭特後備上陣，係佢自10月歐聯對阿積士一役受傷之後，首次披甲。

呢位挪威國腳僅上陣7分鐘，就接應隊友祖利安白蘭特傳中，近門飛身凌空射入，為多蒙特奠定3比1勝局。

多蒙特只係落後榜首拜仁慕尼黑1分，依家有埋艾寧夏蘭特復出，大大增加爭標本錢。