C朗食白果　葡萄牙和波下場定生死！

joemalee · 發表於 2021-11-12 10:45:09

周五(12日)凌晨世盃外歐洲區A組，葡萄牙喺王牌前鋒C朗拿度「食白果」下，作客同愛爾蘭踢成0比0平手，但呢1分亦足以令佢哋憑較佳得失球，壓倒同分嘅塞爾維亞升上榜首，下周一(15日)凌晨小組終極戰主場對塞爾維亞，只要唔輸就可以出線明年世盃決賽周。

葡萄牙今場只要唔輸就上榜首，球員踢得比較緊張，上半場未能組織有效攻勢，戰情相對沉悶。換邊後葡萄牙開始加強壓力，C朗拿度68分鐘曾喺12碼點施展頭槌，可惜攻門貼柱而出，78分鐘C朗右腳熨射，再一次腳頭無靈，最終C朗全場5次攻門都冇收穫，最終葡萄牙同愛爾蘭打和0比0。