古天奴Hea熱身拒絕比賽　沙維點拆？

joemalee · 發表於 2021-11-8 09:58:23

巴塞隆拿周六(6日)喺西甲被切爾達逼和3比3，新帥沙維上場後除咗要諗點樣執好隊波，仲要諗點樣應付菲臘比古天奴呢個「麻煩友」！呢位巴西國腳近年表現麻麻，而且態度亦好有問題，據報對切爾達一仗，安素法迪受傷後原本係由古天奴入替，但佢唔單止Hea住熱身，最後仲拒絕入場，1月離隊似乎事在必行。

上半場尾段安素法迪受傷後，看守教練沙治巴祖安第1時間叫菲臘比古天奴熱身，不過呢位巴西國腳就唔太情願，一直都係Hea住咁熱身，據報沙治巴祖安對佢非常不滿，而據加泰羅尼亞媒體《Esport》報道，菲臘比古天奴更拒絕入替，亦解釋到點解佢率先熱身，但半場換入嘅係小將巴迪，而古天奴全場都冇份落場。