沙拿自稱同C朗一樣咁長　原來指呢樣嘢

joemalee · 發表於 2021-10-25 10:25:20

利物浦前鋒穆罕默德沙拿近期正在同球會傾續約問題，呢位29歲埃及國腳為咗令紅軍放心向佢開出高薪長約，向管理層拍晒心口，話自己嘅顛峰時期，將會同曼聯球星C朗一樣咁長。
利物浦領隊高普一向強烈支持球會同穆罕默德沙拿續長約，但管理層唔鍾意開長約畀30歲附近嘅球員，認為佢哋高峰時間有限。特別係沙拿呢份新約周薪可能高達50萬鎊，令管理層對於開出長約，更加有保留。

據悉，沙拿喺同管理層嘅談判之中，講明自己嘅顛峰時期，將會同曼聯球星C朗一樣咁長。現年36歲嘅C朗今季回巢曼聯，仍然可以成為球隊核心，換言之，29歲嘅沙拿相信自己可以再保持7年顛峰狀態。

沙拿同C朗將於周日(24日)晚英超「雙紅會」曼聯主場對利物浦，正面交鋒，沙拿正好把握機會，踢出身價波，釋除管理層疑慮。