武磊補時5分鐘絕殺！中國3比2險勝越南

joemalee · 發表於 2021-10-9 07:47:33

世盃外亞洲區12強賽B組，中國周五(8日)凌晨同越南苦戰下，憑住武磊喺補時5分鐘上演絕殺，以3比2力克越南，目前同阿曼、日本同樣係3戰得3分，仍然保持出線希望。

今場比賽喺阿聯酋中立場上演，兩隊上半場互交白卷，不過下半場雙方提高速度令戰況激烈，張玉寧53分鐘為中國先開紀錄，75分鐘武磊接應傳中頭槌頂成2比0，以為大局已定之際，越南81分鐘由胡晉才先追1球，補時1分鐘更由阮進靈追成平手！勢估唔到高潮之後仲有高潮，去到補時5分鐘，中國最後一擊由王燊超左路傳中，武磊入楔攻入絕殺，為中國拎到12強賽第1勝。

經過3輪賽事後，B組目前有澳洲同沙特阿拉伯3連勝領先，出線決賽周機會極大，不過第3分附加賽爭奪就相當激烈，同日日本作客0比1不敵沙特阿拉伯後，同中國、阿曼都係得3分在手。中國下周三(13日)凌晨會鬥沙特阿拉伯，相當關鍵。