|
|
樓主 |
發表於 2021-10-5 14:16:35
|
顯示全部樓層
陳浩源最後寫：「有人話，運動員唔係應該排除萬難去解決問題，然後做出好成績咩？係嘅，所以之前咁多年都排除咗唔止萬難，去完成咗一次又一次嘅好成績。不過見到大部分健全運動員都咁幸福，有咁好嘅資源配套。不如都畀我哋幸福埋一份啦。」
danielchanhoyuen
近來好多人問我會唔會退役，會唔會打多三年去巴黎。坦白講，我都有向唔同方面好好考慮緊。當中就包括資源同配套，而場地亦係當中重中之重！喺所有全職殘疾項目入面，只有羽毛球係冇固定場地，即係冇主場。而作為項目入面唯一一位輪椅運動員，我每日就要揸車將自己部輪椅運黎運去，然後由泊車地點花15分鐘推部輪椅去訓練。觀乎所有全職殘疾人士運動員，只有我一個有咁嘅待遇，與有榮焉！
大家可能會覺得奇怪，乜體育學院唔係有羽毛球場咩？係嘅，體院係有16個場地，不過因為我地訓練時間同健全運動員相撞，所以分配唔到我地卑微地要求嘅2個固定場地。
當然，康文署都有配合，所以我地一個星期有4日喺康文署場地度練，2日喺體育學院練。康文署配合梗係好啦，但係係咪最好嘅選擇？
喺出面練，有時會有啲不必要嘅滋擾
喺出面練，有時會有安排失誤，冇場地
喺出面練，有時因為泊唔到車，去唔到練，或者等到遲 （因為冇專用車位，要同街客爭位。而且唔揸車就運送唔到輪椅。而停車場錢咁多年都係我自已俾，我亦係唯一一個要自費停車場費嘅全職殘疾運動員）
喺出面練，受傷冇即時治療，要返體院先可以治療。
當然，體院都有難處。
健全羽毛球隊有差唔多60人，16個場好似都唔夠用。
不過到底資源應該點分配？按咩基準去分配？係咪健全運動員就可以享用最好嘅場地，最好嘅時間？
以我地嘅付出，成績，而大家都係體院嘅全職運動員，係咪我地就冇得用？又或者要健全隊唔用，用完，我地攝啲中間啲時間？
有人話，健全隊到先，所以佢地用晒。
係，係佢地黎先，不過資源分配係會根據唔同情況變更。邊個有需求，又邊個更珍惜？
有人話，羽毛球場俾晒健全隊話事，佢地俾就俾。
我明白，以前得健全羽毛球隊一個係羽毛球場地嘅持份者，梗係佢地話事啦。不過我地殘疾人隊都全職咗4年，其實係咪可以預埋我地一份？
有人話，健全隊練緊，唔可以有其他隊喺度。
一來我地都係羽毛球隊
二來我地又唔係佢地比賽對手，河水不犯井水
三來如何傷健連同一時間放入一個場地入面都唔得，又點提倡共融？
有人話，
你地成績好啲，會幫你搞！
你地亞運有成績，會幫你搞！
你地成為殘奧項目，會幫你搞！
你地殘奧有成績，會幫你搞！
如果佢冇講漏，我都冇做漏，結果。。。
有固定場地，訓練可以有彈性啲，運動員可以去返學或者進修。
有固定場地，我地可以隨時加操，唔使早兩個星期申請。
有固定場地，青訓可以做好啲，有地方做showcase , 放裝備。
有固定場地，自我認可多啲，似返個全職運動員，唔使朝朝早自已搬輪椅咁陰公。
你可以話呢段文字係一個意見，係一個表達，係一個投訴。
而對我黎講，呢個只係：
我打多3年，追求巴黎更進一步
球隊發展多一個10年
殘疾羽毛球成為香港傳統殘奧運動
的基本配套。
最後，有人話，運動員唔係應該排除萬難去解決問題，然後做出好成績咩？
係嘅，所以之前咁多年都排除左唔止萬難。去完成左一次又一次嘅好成績。
不過見到大部分健全運動員都咁幸福，有咁好嘅資源配套。不如都俾我地幸福埋一份啦👍🏻 |
|
樓主: henry1328
在線雷達
發表於 2021-10-5 14:21:26
發表於 2021-10-5 22:46:39
