一個原因！連格拒絕同曼聯續約

joemalee · 發表於 2021-9-9 07:29:39

英國傳媒指，曼聯中場連格已經決定唔續約，意味佢將於明年夏天自由身轉會，據悉連格之所以唔想再留喺曼聯，主要原因係擔心上陣時間不足，可能會影響佢入選英格蘭國家隊出戰明年11月中舉行嘅世界盃決賽周。

連格上季後半段被曼聯外借去韋斯咸之後，為「錘仔幫」上陣16次射入9球及5次助攻，表現備受好評。不過，呢位28歲中場今季返回曼聯，始終不獲領隊蘇斯克查重用，仲未試過以正選上陣，令到連格意興闌珊，干脆等明夏約滿離隊。

由於2022年世界盃主辦國卡塔爾天氣炎熱，所以安排11月21日至12月18日舉行賽事，所以如果連格明夏轉投一支有得踢正選嘅球隊，仲有時間可以表現自己，以行動說服英格蘭主帥修夫基徵召佢踢世界盃。

連格喺早前世界盃外圍賽為英格蘭上陣對安道爾，射入2球及1次助攻，表現非常落力，佢唔想再重演落選今屆歐國盃大軍名單嘅悲劇。