波蘭奇兵後備上陣入3球英格蘭顫抖吧

joemalee · 發表於 2021-9-7 08:52:32

世界盃外圍賽歐洲區I組，波蘭作客以7比1大勝聖馬力諾，羅拔利雲度夫斯基梅開二度，但被後備上陣嘅布克沙搶晒風頭，呢位效力美職球隊新英倫革命嘅前鋒，最後27分鐘上演帽子戲法，認真犀利，成為下場大戰英格蘭嘅秘密武器。

由於聖馬力諾太弱，波蘭上半場已經領先4比0，羅拔利雲度夫斯基轟入2球，呢位效力拜仁慕尼黑嘅射手踢完上半場，就被收起，明顯留力周四(9日)凌晨外圍賽主場對英格蘭。

估唔到入替羅拔利雲度夫斯基嘅布克沙，表現更加搶鏡，佢67分鐘入波後，再喺補時連入2球，完成帽子戲法。

現年25歲嘅布克沙身高1米91，屬於典型空中霸王，佢出道以來大部份時間喺波蘭本土聯賽搵食，上年轉投美職球隊新英倫革命，本來表現平平無奇，今場卻一戰成名，英格蘭防線下場真係小心提防呢位高佬。