老孫一箭定江山 熱刺悶悶哋「屈」機

joemalee

周日晚（29日）英超頭場之一，熱刺新帥紐奴繼續保持「悶蛋」風格，憑南韓前鋒孫興民一箭定江山，喺主場以1:0擊敗屈福特，3戰全勝兼保持不失，升上榜首。

上周宣布留隊嘅熱刺王牌哈利卡尼，今季首次喺聯賽正選披甲，不過佢明顯狀態麻麻，初段屈福特不斷靠艾曼紐丹尼斯於左路發難，製造威脅，可惜唔太入肉。去到42分鐘，孫興民於左路開出罰球，過程中雖然冇人頂到，但門將丹尼爾班治文因視線受阻唔敢出迎，反而被收死，熱刺先開紀錄。

易邊後熱刺趁對手大舉反撲，不斷有反擊機會，其中孫興民於中場策動畀哈利卡尼，「哈神」再橫傳畀迪利阿里快射，但僅僅斜出，完場前「哈神」近門勁射又被救出，最終熱刺小勝1粒，開咧頭3仗聯賽均贏1:0，成為今季英超唯一3戰全勝兼冇失波嘅球隊，新帥紐奴以往執教狼隊都以「悶蛋」見稱，來到熱刺繼續玩「悶悶哋贏」，以乎高層利維今次搵啱領隊。

BB29

熱刺升上榜首

HKtraveler

入果球其實好求其

LasCases

開季又幾好。