韋利安要求解約願減薪70%返巴西搵食

joemalee · 發表於 2021-8-30 06:30:13

阿仙奴今季英超3戰全敗，0入球失9球，表現慘不忍睹，隊內巴西中場韋利安更加想「跳船」，要求提早解除餘下2年合約，寧願賺少70%人工，都要返巴西搵食，希望轉投巴甲球隊哥連泰斯。

33歲嘅韋利安上年8月以自由身從車路士轉投阿仙奴之後，表現未如理想，上季英超25次上陣僅入1球，今季仲未披甲，一般相信領隊阿迪達已經放棄咗佢。

不過，周薪高達24萬鎊嘅韋利安並冇打算白逗人工，主動提出結束餘下2年合約，令佢可以另投其他球隊，把握所餘無幾嘅球員生涯綻放餘輝。對於阿仙奴亦有好處，起碼可以節省2,000萬鎊薪酬支出，相信願意放走韋利安。

韋利安打算返回母會哥連泰斯搵食，並願意減薪70%，佢出身於哥連泰斯青年軍，曾為一隊踢過2季巴甲，其後去歐洲發展，效力過烏克蘭勁旅薩克達、俄羅斯球隊安治，2013年加盟車路士，捧過2次英超冠軍，阿仙奴可能成為佢歐洲之旅最後一站。