大叔的愛｜練美娟讀書時係校花入行後曾兼職調酒師維持生計

GIRLAV · 發表於 2021-7-16 14:51:22

ViuTV劇集《大叔的愛》今晚（16日）播出大結局，相信唔少觀眾都會依依不捨。劇集贏盡口碑，除咗三位男主角MIRROR成員Edan（呂爵安）、Anson Lo（盧瀚霆）及黃德斌人氣急升之外，唔少劇中演員亦備受關注，當中包括飾演辦公室行政助理賴嘉雯（Carman）嘅練美娟（娟姐）。佢喺劇中係個超級饞嘴兼八卦嘅同事，及與平哥（楊偉倫飾）有感情線，唔少網民都大讚佢演技自然又具喜感。

現年31歲嘅練美娟，年幼時跟隨印尼華僑父母回流香港。雖然娟姐嘅大癲大肺形象深入民心，不過五官精緻嘅佢喺讀書時係校花，仲被封為「自修室女神」。早前有屯門街坊接受傳媒訪問時就話娟姐唔止靚女，讀書成績優異，仲要係運動健將。

2017年練美娟以27歲之齡加入娛樂圈，雖然起步俾好多人遲，不過佢就認為遲入行都有好處，因為佢之前做過唔同類型工作，所以有待人接物嘅經驗。練美娟喺主持ViuTv節目《Girls' Talk》後為人熟悉，當時佢一邊主持《Girls' Talk》，一邊去尖沙咀酒吧兼職調酒師維持生計。娟姐認為好多藝人都有做兼職同兼顧副業，因為咁樣先可以有足夠收入，維持藝人呢份唔穩定嘅職業，所以如果有人問嘅話，佢會欣然話自己做過調酒師同侍應。

之後，練美娟開始參與唔少綜藝節目及劇集拍攝，為工作不顧形象，例如《金剛旅神團》「鯨吞」吞拿魚骨髓、為效果而呼喝金剛、《大叔的愛》劇中角色係一名為食妹，為追求真實感，佢就選擇真咬同真吞食物，結果令體重增加咗成3至4公斤；又喺《造美人》唔錫身地與參加者喺室內進行運動會等等，令觀眾喜愛其真性情。