美斯未肯續約巴塞　因為驚坐監

joemalee · 發表於 2021-7-2 06:51:51

阿根廷巨星美斯已經回復自由身，佢同巴塞隆拿續約問題仲拖住，內情複雜，原來美斯未仲動筆簽約，主要原因係驚觸犯西班牙法例，嚴重嘅話要坐監。

西班牙傳媒報道，巴塞準備同美斯續約2年，合約總值2億歐元，但會分10年支付，問題就出嚟呢度。巴塞為降低薪酬水平，由6億歐元下降到3億歐元嘅西甲聯盟新標準，向美斯提出人工「分期付款」方案，但此舉可能令美斯犯法。

美斯團隊提出，當美斯掛靴離開西班牙，但巴塞仍然支付薪水，此舉勢必觸犯西班牙稅務條例，由於美斯曾經因為漏稅問題被罰，不過當時屬初犯唔使坐監，如果今次再犯，到時美斯有大可能被判監，或成為逃犯。

巴塞同美斯續約現時成為死結，巴塞正循不同途徑解決此問題，對於美斯續約亦無時間表。