多蒙特又淘寶　今次睇中荷蘭神鋒

joemalee · 發表於 2021-6-28 23:46:42

德甲勁旅多蒙特買賣球員方面成日賺大錢，今夏將會以大約9000萬鎊天價出售查頓辛祖畀曼聯，大賺一筆，其實另邊廂佢哋已準備入貨，今次睇中荷蘭前鋒當耶爾馬倫，由於荷蘭已於16強出局，該球員身價唔會太高，估計為3400萬鎊，啱晒多蒙特低買高賣嘅營商手法。

英國《太陽報》報道，查頓辛祖幾近落實轉會曼聯，多蒙特將會收取9000萬鎊轉會費，佢哋將會用呢筆錢嘅大約3分1，去物色下一個目標，消息指佢哋睇中效力燕豪芬嘅荷蘭新進國腳當耶爾馬倫。

當耶爾馬倫年僅22歲，踢法特點係速度奇高，最高速度達到時速31.3公里，今屆歐國盃嶄露頭角，多蒙特喺淘寶方面經驗豐富，準備簽佢頂替查頓辛斯，或者幾年後當耶爾馬倫交出好表現，有豪門「水魚」洽購，多蒙特又會以天價出售賺錢。

其實燕豪芬仲有另一件筍貨，就係翼鋒杜費斯，杜費斯喺歐國盃攻入2球，成功上位，據講燕豪芬已有晒心理準備，當耶爾馬倫同杜費斯在歐國盃後將會離隊。