馬古斯貝治門前失機　球迷要求開除佢國籍

joemalee · 發表於 2021-6-17 06:40:59

歐國盃周二（15日）凌晨E組大戰，瑞典最終同西班牙踢成0比0。賽後2隊前鋒嘅把握力成為焦點，除咗西班牙前鋒莫拉達之外，瑞典前鋒馬古斯貝治同樣喺社交網站畀球迷「喪插」，甚至有人要求瑞典足協開除佢嘅國籍。

瑞典整場具威脅埋門次數不多，當中馬古斯貝治就喺61分鐘錯失黃金機會，阿歷山大伊沙克面對3人包夾勉強傳中，揾到呢名伏兵尾柱嘅34歲老將，但佢竟然門前射斜，最終令瑞典未能夠全取3分。

賽後瑞典球迷對馬古斯貝治呢下射失相當不滿，甚至要求瑞典足協開除佢嘅國籍，不過一眾隊友就好撐佢，阿歷山大伊沙克更解釋屬於運氣問題；至於瑞典足協透露已經收集咗證據，並且同警方以及安全部門取得聯繫，唔排除對球迷採取法律行動。