美斯成當今「罰球王」　阿根廷又和波冇霸氣

joemalee · 發表於 2021-6-15 08:45:19

周二(15日)朝早美洲國家盃A組大戰，阿根廷雖然有美斯射入精彩罰球，但球隊整體演出仍然缺乏霸氣，最後更因後防犯錯輸12碼，最終只能同智利踢成1比1平手。連同世界盃外圍賽，阿根廷近5場比賽第4次和波，未能顯示出爭冠嘅實力。

阿根廷上半場佔盡優勢，盧施素、里安度柏利迪斯喺中場策動唔少入波機會，可惜拿達路馬天尼斯同尼高拉斯干沙利斯連番失機，直到33分鐘都係要由「球王」美斯出手，佢禁區外罰球妙射建功，令阿根廷領先1球返更衣室。換邊後智利加強反撲，令阿根廷承受唔少壓力，57分鐘維達爾博到12碼，佢親自操刀雖然被救出，但伊度亞度華加斯補一頭頂成1比1。阿根廷尾段發力製造唔少攻門，可惜都未能把握，最後握手言和。

統計顯示，美斯對上一次喺國家隊射入罰球已經係2016年11月，呢個入波亦係美斯職業生涯第57個罰球入波，正式超越C朗拿度(56球)，成為現役球員中射入罰球最多嘅「罰球王」。