美洲盃開幕！尼馬率巴西3球大勝委內瑞拉

joemalee · 發表於 2021-6-14 07:20:04

美洲國家盃周一(14日)朝早開鑼，開波前臨時接辦今屆賽事嘅東道主巴西，揭幕戰以3比0大破委內瑞拉，喺B組旗開得勝。焦點球星尼馬今場表現活躍，巴西大部份攻勢都係由佢策動，最後佢亦交出1入波同1助攻成績表，成為巴西贏波最大功臣。

巴西挾住7連勝走勢出戰，今場面對實力較弱嘅委內瑞拉順利控制戰局，23分鐘尼馬開出角球，馬昆奴斯哥利亞門前亂軍中搵到機會射入；2分鐘後李察利臣曾入楔中路建功，可惜越位在先被判詐胡。

巴西去到64分鐘增添紀錄，丹尼路雷斯殺入禁區被對手踢跌，球證直指12碼，尼馬操刀順利射入。完場前1分鐘尼馬突破越位，推過埋門將後傳中畀加比爾巴保沙撞入空門，協助巴西大勝3比0。