人工低過邊緣人 魯迪格冇肥約就「落車」

joemalee

車路士啱啱先攞完歐聯冠軍，就傳出陣中主力後衞魯迪格，想喺出年完約後離隊嘅消息。皆因現時呢位德國中堅嘅人工，係隊內頭十以外，佢想另謀高就搵大錢都唔係冇道理。

28歲車路士守將魯迪格，今季為「藍軍」上陣34場攻入1球，更加係今屆贏得歐聯冠軍嘅功臣之一。之不過據悉佢依家嘅周薪只有10萬英鎊，遠不及迪姆華拿、基斯甸普列錫等主力，甚至低過真禾特、泰莫爾巴卡約高等邊緣球員。

呢位德國後衞喺2017年由羅馬「上車」，同「車仔」嘅合約只係去到2022年6月，假如車路士未能同佢傾成續約，到出年1月佢就可以開始同其他球會商討免費轉會，以佢嘅表現根本唔愁冇買家。據報道指，魯迪格本人傾向想搵一份職業生涯以來最高薪嘅合約，但佢暫時唔急於同車路士傾續約，因為想先專注喺為德國征戰歐國盃上面喎。如果車路士唔想「人財兩失」，睇嚟要出動一份「肥約」先可能打動到佢留低嘞。

LasCases

要份大約。