般費2射1傳　葡萄牙大炒以色列

joemalee · 發表於 2021-6-10 08:48:58

周四(10日)凌晨國際熱身賽，葡萄牙以4比0大勝以色列，效力曼聯嘅中場般奴費南迪斯射入2球及1次助攻，風頭蓋過隊長C朗。葡萄牙亦以今場大勝，為爭取衞冕歐國盃壯聲威。

葡萄牙今場熱身賽，「曼市雙雄」球員搶晒鏡，踢到42分鐘，效力曼城嘅右閘祖奧簡斯路傳中，般奴費南迪斯衝前第一時間勁射入網。

僅過2分鐘，般奴費南迪斯帶波長驅直進，傳畀C朗射成2比0。換邊之後，仍然係葡萄牙嘅世界，祖奧簡斯路由右路扣入中路射遠柱入網，非常瀟灑。
最精彩一幕喺補時出現，般奴費南迪斯喺禁區頂勁射死角入網，絕對係一球世界波。

值得一提，今場係般奴費南迪斯自2019年11月對盧森堡入波之後，相隔1年半，終於再次為葡萄牙建功，相信呢位中場大腦已經準備好喺歐國盃表演。
葡萄牙將於6月16日凌晨歐國盃F組對匈牙利，同組仲有德國、法國。