曼聯加薪25%留卡雲尼

joemalee · 發表於 2021-5-10 06:52:48

卡雲尼打算喺曼聯踢多一季，不過仲要睇會方開咩條件。英國《太陽報》報道，曼聯向卡雲尼開出加薪條件，由現時20萬鎊周薪加到25萬鎊，等待卡雲尼答允。

報道指，卡雲尼原本打算返回南美，但現時或者回心轉意，仲有人工加都算唔錯；其實當初卡雲尼由巴黎聖日耳門自由身加盟曼聯，當時係減薪來投，下降比率大概係35%，不過卡雲尼額外獲得一筆過600萬鎊簽字費，咁先至拉番勻條數。

34歲嘅卡雲尼今季上陣35場入15球，周日晚對維拉又有教材式入波示範，今季效力期間教識拉舒福特同格連活特點踢中鋒，唔單止咁，佢仲充當保護角色，早前歐霸盃對羅馬，格連活特被對方球員圍攻，卡雲尼二話不說衝埋去同對方對抗，淨係靠佢「睇住班細」都抵番。咁多嘢加埋，加人工25%都好應該啦。