窮困！皇馬連續兩季冇奪冠獎金

joemalee · 發表於 2021-4-24 23:33:04

西班牙《馬卡報》報道，皇家馬德里繼去年奪得西甲，球員冇獎金之後，今年財務狀況未見改善，即使今季奪冠，球員將連續第2季冇獎金！

受疫情打擊，皇馬上季後上奪得西甲冠軍後，未有向球員發放奪冠獎金，更反過來要求主力續約時減薪10%至30%，一個球季即將過去，至今只有少數球員如莫迪歷願意減薪留隊，隊長沙治奧拉莫斯就拒絕減薪，今夏約滿就會自由身離隊。

報道指，皇馬高層認為，球員一方面減薪，另一方面又發放獎金，這種做法不合邏輯，因此決定唔會發放獎金，亦係會方連續第2季咁樣做。

皇馬此種做法無疑打擊士氣，不過球員都好專業，到目前仲好搏命，西甲及歐聯都有奪冠機會，但對球員嚟講，冇獎金等同白做。不過皇馬就可以慳番筆支出，據報皇馬今季預計收入已由9億歐元下降至6億歐元，主要收入來自歐聯，打入4強令會方可獲得接近1億歐元，如果晉級決賽，將可至少獲得1.15億歐元收入。