謝芷倫憑《愛·回家之開心速遞》Mandy彈起傳與中年男士秘密拍拖2年

GIRLAV · 發表於 2021-2-3 14:24:42

謝芷倫（Jan）憑《愛·回家之開心速遞》林美香Mandy一角成功入屋，劇中佢同博士（馬貫東飾）呢一pair更加深受家庭觀眾愛戴，不時都有觀眾想佢快啲返劇組。謝芷倫喺2014年參選港姐時，有傳佢為入行而同未婚夫分手，當時佢就話冇啲咁嘅事。佢仲話入行後感情一直未有著落，不過今日就有報道指佢已經名花有主，與一名身型略胖嘅有米中年男士行街繑手，仲話佢哋已經秘密拍拖兩年添呀！

報道指謝芷倫當日與呢名身型略胖嘅男士行街街，男方喺時裝店試背囊，Jan都有俾意見，不過最後都冇買。行街期間佢哋非常謹慎，直至臨離開時Jan先主動繑住男方隻手，期間男方仲幫佢拎手袋。之後，男方仲揸住架約60萬嘅名車送佢返屋企。其實大約兩年前已經有傳媒影過Jan同朋友打完波後，有男友人揸住同款車送佢返屋企，所以估計佢哋已經地下情咗兩年。

32歲嘅謝芷倫係一個聰明又動靜皆宜嘅女仔，除咗識跳芭蕾舞同彈鋼琴之外，仲係一位跨欄運動健將。中學畢業後去咗澳州著名大學Macquarie University升學，工商管理系畢業。2014年參選香港小姐，當年係大熱門之一，可惜十強止步。雖然落選咗，但佢都被無綫睇中簽約做藝人，不過發展機會一直唔多。直至2017年，佢有份參演《愛·回家之開心速遞》，喺劇中飾演拜金港女兼「大小姐」嘅秘書林美香Mandy，入屋成功。雖然Jan已經離開劇組，但佢已開始拍其他劇集同綜藝節目，例如《跳躍生命線》、《大醬園》、《法證先鋒IV》、《機場特警》、《姊妹淘》及《三日兩夜》等等。