邵家臻預佔中案坐監密袋捐款找數

powertvb · 發表於 2018-8-18 18:45:08

本帖最後由 powertvb 於 2018-8-18 18:48 編輯

政情：邵家臻預佔中案坐監密袋捐款找數

二○一四年爆發嘅違法佔領行動，至今只有九人被檢控，當中包括公民黨立法會議員陳淑莊同社福界議員邵家臻，兩人仲一早打定輸數預咗要坐監，邵更講過會喺獄中寫書。不過，睇番立法會議員個人利益登記冊，邵喺過去一年收咗唔少捐款，多次來自「守護公義基金」（基金），差不多每三個月收一次，最新上月再收多廿萬元。佢密密袋嘅捐款，咪等於係市民幫佢找數。

邵前後收57萬未見陳淑莊申報
根據立法會議員個人利益登記冊，邵家臻最早喺舊年七月申報，自己係基金同「核心價值基金」可能受益人，同年十一月，佢分別收咗基金十萬元及核心價值基金約十七萬元。到今年四月及七月，佢又收咗基金十萬元及廿萬元。數數吓，佢前前後後都收咗五十七萬元，反而未見陳淑莊有相關申報。
問番邵家臻收咁多錢會做乜？佢就解釋，款項用作打官司，已經全數交予律師，強調有收據兼不經個人戶口，基金向涉案九人每人提供四十萬元，另外核心價值基金嘅款項，只係專業議政籌款捐助佢嘅心意。佢又話暑假期間正在準備上庭，會同律師見面討論，而作為社工，永遠都係作最好嘅盼望同最壞嘅打算。

佔中三子當初講明會承擔罪責，但被檢控後即刻變臉，擺明係去飲唔找數，依家齋計邵家臻都收幾十萬元，九人加埋起碼要使三百多萬元，相信基金好快就見底，到時又會無限輪迴，掠水、使錢、再掠水，變成無底深潭。

港獨叫你請勿乞食！