濫用公務探訪搞亂懲教雙學三子惡人先告狀

Sichuanman · 發表於 2017-11-23 08:31:57

本帖最後由 Sichuanman 於 2017-11-23 08:38 編輯

《東方》濫用公務探訪搞亂懲教雙學三子惡人先告狀

因三年前衝擊政府總部被改判入獄嘅「雙學三子」，黃之鋒、羅冠聰及周永康近排保釋外出等候上訴，出嚟之後頻頻講坐監幾慘，又話畀人剝光豬，又話啲懲教人員好惡，講到好似去監獄做完體驗出嚟要評分咁！但查實三個人係坐「風流監」，同一般囚犯唔同，事關班泛民議員濫用「公務探訪」制度去探監解悶，等佢哋唔使做嘢之餘，仲可以喺冷氣房攤抖，懲教署仲要安排額外人手去處理，應該冇人坐監坐到好似佢哋咁勞師動眾，出番嚟仲要去投訴懲教署，真係惡人先告狀！
黃重提「剝光豬」事件
黃之鋒、羅冠聰同周永康聯同社福界議員邵家臻同張超雄，尋日去咗懲教署總部投訴兼交意見書，仲話要同署長林國良對話。黃之鋒仲提佢之前去東頭懲教所，按慣例就要問話同搜身，點知除晒衫之後，有個懲教人員唔畀佢着番衫，剝光豬踎低答問題，佢話覺得好侮辱喎，「好似狗望主人答問題」，又話咁嘅政策令人身心受創。周永康同羅冠聰就冇嘢夾硬搵嘢講，向懲教署就懲罰同教育機制提供意見，仲話希望成個制度可以更切合懲教署「自力更生」嘅宗旨咁話。

其實黃之鋒保釋出嚟後已經公開講過「剝光豬」事件，而林國良喺公開活動都回應過，話懲教署唔會因為政治人物入獄而有特別安排，會一視同仁咁處理。針對「雙學三子」嘅投訴，懲教署發聲明話署方係以專業態度，根據香港法例同相關規則執法，並會照顧到在囚人士的基本需要，但所有在囚人士嘅待遇均須受到合理同恰當限制。
懲教職員協會表憤慨
懲教人員嘅反彈都好大，香港懲教事務職員協會對事件表示非常憤慨，強烈要求個別立法會議員停止為達到政治目的，而持續借助傳媒炒作。
老實講，保安局早前回覆立法會時證實，立法會議員近日到個別懲教院所進行公務探訪嘅頻密程度同探訪時數，均有顯著增加，懲教署因應需要安排額外人手處理，而且對在囚人士羈押期間工作及參與更生活動等，「難免有一定影響」。明明係「雙學三子」同班泛民擾亂懲教在先，依家仲惡人先告狀，若要改機制，首先就應該改「公務探訪」制度，杜絕佢哋濫用就真。

坐牢都要講民主自由？話明坐牢！是要剝奪你既自由，
早知今日何必當初，犯咗法就要埋單！特首都無情講，何況只是一個廢青