惡女被紙飛機掟中，向男童動粗惹爭議。

sadsam167 · 發表於 2016-8-25 05:24:41

本帖最後由 sadsam167 於 2016-8-25 05:26 編輯

近日網絡流傳一段短片，內容大致上係講緊一個自稱李大當家嘅女士，疑似因為小朋友架紙飛機整到佢而大動肝火，粗口橫飛都算仲出腳踢個小朋友！呢位小朋友媽咪即刻上前道歉並詢問"李大當家"點解要踢佢個小朋友，引來一連串精彩罵戰。

以上影片乃youtube提供,與本站無關; 若無法觀看,可查看原網址。

香港地乜人都有，好似片中人咁野蠻嘅女士都算係極品之一，同一位小朋友斤斤計較都算，言行完全唔似一個正常成年人，如果附近有精神病院，我有理由懷疑佢可能係其中一名走失左嘅院友。

首先，只係一架毫冇殺傷力嘅紙飛機都可以激起佢三丈火，可想而知大當家嘅EQ有幾高！被紙飛機偷襲背脊，一嚟就用粗言穢語辱罵一個細路，講唔夠二句仲上前腳踢對方，真係小家到冇朋友。

我諗任何人見到自己仔女比陌生人攻擊都會異常緊張，呢位媽媽都唔例外，上前了解事件後已經好禮貌咁代為道歉，不過呢位媽媽似乎未接觸過呢類野蠻人，竟然同佢講理，問佢有冇必要出腳踢自己個仔。

唔問都好，一問就把起火，自卑心作祟嘅大當家唔知點解會覺得個細路係有目的咁用紙飛機整佢！正常人都會知道係唔小心，同埋非針對性行為，講講下又響朵又問人跟邊到，唔講我以為自己睇緊小學雞版古惑仔。