想請教一下各位師兄師姐...

build.gates

小弟有啲問題想請教一下各位師兄師姐...

事情係咁嘅...

小弟有個習慣, 無論去到邊都好鍾意撩身邊出現嘅狗仔貓仔玩, BB仔都會架, 有一日我喺佐敦一間賣頭髮用品嘅舖頭門口見倒一隻貓仔,
我當然唔放過走去撩下佢啦, 佢又好似唔太介意被我摸, 連舖頭入面個老闆娘都認得我, 咁我就差唔多一個禮拜有4-5日會去玩下隻貓嘅,
但係過幾個月, 我發現隻貓仔唔見左, 起初我以為隻貓仔走左去第二度玩啦, 但係之後隔左一個禮拜, 都冇見過隻貓仔,

有陣時隻貓仔會同埋其他喺附近出沒嘅貓仔一齊, 但係果個禮拜連其他貓都消失埋, 最後我就走入去問老闆娘隻貓去左邊,

老闆娘就同我講...

"有一次有一個客人同我講隻貓仔唔食野係因為有病(當時隻貓真係唔食野, 老闆娘都同我講話最近貓仔成日唔食野, 又成日呢埋一角,好似知道自己就黎唔得咁...), 果個客人話自己係義工, 可以幫我帶貓仔去動物診所CHECK下同埋醫治一下咁, 之後佢就帶走左隻貓仔, 話拎左去九龍城一間動物診所到比個醫生睇睇."

咁我就即刻問佢, 果個義工帶左佢去邊間動物診所呢, 老闆娘就話, 個義工唔肯講係邊間, 但係同老闆娘講隻貓仔係嚴重營養不良, 要慢慢調理返好先得, 老闆娘曾經問過果個義工可唔可以比返隻貓仔返黎, 等佢地去照顧返隻貓或者搵醫生, 但係果個義工就同老闆娘講,
"而家隻貓日日都要打針同埋打D咩皮下水, 比返你地你地識打咩?  你地有時間去打咩?  等醫護人員處理啦"
咁我就同老闆娘講, "咁冇理由連邊間動物診所都唔肯講掛?? 會唔會係流架??", 老闆娘就話, "過一兩日我再打電話比果個義工問問啦, 我都好掛著隻貓, 掛到個人都有少少病同埋好唔舒服...", 咁我叫老闆娘多啲休息, 身體好返先再搵果個義工啦, 身體要緊...

老闆娘唔講都唔知, 原來老闆娘養果隻貓已經十幾年, 隻貓其實同老闆娘都一樣係好大年紀, 只係隻貓仔平時食野唔多, 同埋生得細隻, 起初係一隻自來貓, 日日都見倒佢, 日子耐左就變成日日喺老闆娘舗頭打躉, 老闆娘亦都當左佢係自己一家人咁, 買野比佢食, 只係隻貓有D怪, 唔鍾意喺舗頭入面過夜, 每日老闆娘收舗嘅時候, 隻貓都會走出去出面瞓覺, 唔會留喺入面, 出面幾凍都係咁...

過左幾日, 我再去探老闆娘問問隻貓嘅事, 老闆娘成個人冇晒心機, 同我講個義工話隻貓仔病情屬於普通, 應該唔大問題, 但係隻貓喺果間動物診所調理完之後, 會喺果度睇下有冇人收養, 又怪老闆娘之前唔好好地對隻貓仔, 到老闆娘問可唔可以比返隻貓仔佢, 醫療住院費佢會照比返時, 個義工又話隻貓本來就係流浪貓, 冇人有權帶走返去養咁話...

咁問題就黎嘞, 究竟果D日日口口聲聲話自己係動物義工嘅人係唔係咁樣做野法架??     

而家即係點呀??     
無啦啦走條友出黎話自己係動物義工就捉走左人地養左十幾年嘅貓, 捉左又唔肯話比人知捉左去邊,
到人地要拎返隻貓嘅時候就話隻貓本來就係流浪貓, 冇人有權帶走, 咁同搶有乜分別??   
成日口口聲聲話講人道, 突然走去搶左同人地相處左十幾嘅貓, 之後完全唔比事主同隻貓接觸, 咁就係人道牙???   

呢件事到到我而家出POST都未有下聞, 係呢幾個禮拜之內嘅事.....     

我真係好想知道果D日日口口聲聲話自己係動物義工嘅生物係人定係畜牲....