日職　正！J-League經理人賣大包玩多年

man36951 · 發表於 2016-1-30 22:26:00

【on.cc東網專訊】鍾意睇波嘅球迷，通常都鍾意睇靚女，日本職業聯賽好明白呢個道理，J-League聯賽會宣布，22歲嘅特命經理人佐藤美希答應賣大包玩多年，佢上年去勻日職同日乙球會主場，瞓身宣傳同埋陪住巴打睇波，大家唔使驚會悶親啦！
J-League第1代特命經理人足立梨花做咗3年至「畢業」，作為第2代嘅佐藤美希，當然唔可以做完1年就講拜拜啦，如果唔係球迷反枱都似。雖然最近佐藤美希因為推出爆乳年曆人氣急升，但並冇忘本，反而堅持繼續陪球迷睇波，相當抵得諗。
佐藤美希本身讀護士專門學校，又學過柔道，加上佢係時裝雜誌《non-no》嘅模特，人氣自然愈來愈高，而且唔止喺日本受歡迎，就連喺中國同台灣都有唔少粉絲，最近佢推出嘅爆乳年曆，更加成為水著界話題，相信新一季J-League會吸引好多巴打睇。