「鯉魚妹」！2016年你一定要識！

man36951 · 發表於 2016-1-14 17:45:22

【on.cc東網專訊】「鯉魚妹」你真係要識！日本職棒球會廣島東洋鯉魚隊近年儲埋超多女球迷，佢哋每次入場睇波都會襯到靚一靚，由於當中有唔少索女，而且人數超多，東瀛傳媒稱呼佢哋做「鯉魚妹」，甚至紅到出寫真集，今年鯉魚隊仲進行官方「鯉魚妹」選舉添呀！
鯉魚隊背後冇大財團支持，根據球會高層表示，其實「鯉魚妹」嘅出現，並唔係佢哋故意製造出嘅熱潮，最初主要係想吸引球迷一家三代同時入場，但後來「鯉魚妹」愈來愈多，好多學生同OL都順應潮流加入，感覺上唔做「鯉魚妹」就冇朋友。
事實上，鯉魚隊嘅網誌一直有上載唔同「鯉魚妹」靚相，而且有出版社喺2014年推出史上首本「鯉魚妹」寫真集，證明佢哋人氣勁高，書中除咗有網上人氣「鯉魚妹」，仲請到當紅水著偶像同人氣模特出鏡，連兩大宅男女神松本愛同武田玲奈都有份！
除此之外，其實「鯉魚妹」有二次元動漫版本，迎合唔同球迷口味，同時為咗延續「鯉魚妹」熱潮，鯉魚隊已宣布進行官方「鯉魚妹」選舉，準備選出3個最正女球迷，主要負責喺主場招呼擁躉，據講反應超好，2016年「鯉魚妹」你要識至得。