[轉貼]環保紙片電池易整又易叉

Chickworm619 · 發表於 2015-12-11 15:48:28

機身大小同電量經常處於對立狀態，想細得嚟續航力強，發夢都冇咁早。瑞典Linköping University研究出一種紙片電池，採用隨處可見嘅物料製造，儲電量極高，叉幾秒即滿電，薄機同大電從此可以和平共存。
電池睇落膠味十足，顏色似足橡膠車軚，由納米纖維素（nano cellulose）跟導電聚合物複合而成，前者可取自大自然兼且能夠再生，後者要入手亦毫無難度，當中不含任何重金屬，夠晒環保。只需利用水壓將纖維素分解至直徑20nm，之後混入聚合物溶液，於表面形成薄膜即大功告成。

咪睇佢弱質纖纖咁，其實強韌度十足，能屈能折；而且厚0.1mm、直徑15cm電容已達1F，相當於市面上嘅超級電容器，滿電時間僅需數秒，可重覆使用數百次。目前問題在於點樣量產化，不過團隊已經收到一筆巨款，未來會致力研究專用「造紙機」，務求開設快速生產線，將電池推出市面。