亞男遇上「唔方便」日子祖藍繼續守齋

米高奧雲 · 發表於 2015-2-15 20:52:44

王祖藍同老婆李亞男今日喺廸士尼擺酒，佢哋接受訪問時心情靚爆，問到噚晚點，亞男話:「好攰呀，都即刻瞓覺，食完情人節晚餐跟住就瞓嘞。」祖藍話:「係呀，呢幾晚冇乜點瞓。」咁咪好浪費洞房花燭夜？亞男甜笑兼怕羞話﹕「唔方便講，因為真係唔方便。」祖藍就話﹕「哎吔，你哋揣摩吓啦。」似乎係亞男遇上「唔方便」嘅日子。

咁係咪好失望先？祖藍話:「唔緊要啦，我都留精力今日擺酒用，反正今晚都唔方便，留番HONEY MOON一次過，完埋今晚後，要去上海同親戚食飯，跟住三星期去歐洲HONEY MOON，去四個地方，順應公主要求要有浪漫氣氛，佢想點就點啦。」亞男話:「浪漫都好緊要，因為新婚。」

咁今晚婚宴點先？祖藍話﹕「今晚無驚喜，悶到爆，請杜麗莎個女幫手進場時唱歌(浪漫歌0)，有請LIVE BAND唱歌，好多朋友自動獻身話今晚會嚟表演唱歌，阮兆祥、韋綺珊，杜麗莎，邊個即慶就可以上嚟，仲有請獎門人。」叫佢嚟玩兄弟姊妹及一對新人?祖藍話:「佢要點玩就點玩，冇佢我都求唔到婚。」咁叫佢手下留請？祖藍笑言「任佢玩」:「曾志偉專登過嚟，聽日又要開工。」

怕唔怕俾人隊酒？祖藍就話唔怕:「我啲賓客都好乖，兄弟好頂得。」但志偉一個都唔乖啦？佢話:「志偉事前講咗，去美國做嘢，話『唔過關都要人抬』，自己都不醉無歸，今晚橫掂都瞓。」又瞓？咪又浪費咗？亞男就搶答﹕「都唔浪費，其實係好SWEET好甜蜜嘅回憶。」

係咪因為基督徒第一次要學習吓？祖藍就話﹕「唔方便講。」Ready好未先？祖藍話﹕「I am ready，She is not。」亞男又笑住答﹕「係，搵吓心理輔導。」