【轉載】東岸決賽翻版戰莊家睇好熱火贏溜馬

galexplorer · 發表於 2014-5-18 10:49:38

溜馬明日於主場與衞冕的熱火上演上屆東岸決賽翻版戰Game 1。溜馬因常規賽成績較佳而有主場之利，但有美國博彩網站就看好熱火會再一次打入總決賽，開出1.24倍超熱晉級賠率。雖然溜馬被睇低一線，然而主力保羅佐治（Paul George）卻相信球隊可粉碎熱火3連冠美夢！

溜馬雖在常規賽造出56勝26負的佳績，成為東岸頭號種子，但季尾表現低迷，到季後賽亦是時好時壞。相比熱火季後賽9戰8勝1負，輕鬆打入東岸決賽，溜馬首圈就要與鷹隊打足7場，次輪對巫師表現亦無明顯改善，要靠老將大衞韋斯（David West）才可重返東岸決賽。美國博彩網站Bovada在東岸決賽勝出球隊的項目中，熱火晉級開出1.24倍超熱賠率，溜馬則為4.1倍，完全睇淡溜馬可以自千禧年後再次殺入總決賽。

雷霆伊巴卡或收咧
雖然如此，保羅佐治仍相信球隊有望衝擊總決賽：「我哋夠硬淨，又夠經驗，呢班波已經夾咗3、4年，一直都有出席季後賽，所以預計到會發生咩事。最重要係大家已經做到臨危不亂，所以唔會有問題。」雙方明日將假溜馬主場展開7場4勝制的Game 1。

至於力壓快艇打入西岸決賽的雷霆在周二對馬刺前收到壞消息。內線要員伊巴卡（Serge Ibaka）因左小腿受傷，極有可能要提早收「咧」，緣盡季後賽。