阻住高官出入 Formula E冇得嚟香港

Kick Off · 發表於 2013-12-6 14:54:49

超掃興！國際汽車聯盟（FIA）星期三落實首屆電能車方程式（Formula E）賽期，原本計劃喺明年11月8日舉行嘅香港站，竟然消失咗喺10個分站名單入面，香港車迷想喺中環鬧市睇賽車，死咗條心啦！消息指，搞唔成嘅原因係政府唔支持，唔肯簽主辦意向書。

被里約熱內盧取代

顧名思義，電能車方程式係用電唔用汽油，主打環保概念，加上主辦單位香港汽車會構思，將中環近海傍一帶嘅馬路臨時改建成賽道，有成個維港海景做襯托，好有吸引力。估唔到，FIA星期三公佈嘅正式賽程，以「盛事之都」自居嘅香港榜上無名，由巴西里約熱內盧取代，真係空歡喜一場。

香港汽車會會長余錦基正喺法國巴黎公幹，佢接受本報長途電話訪問嗰陣，只係話下星期返港就會開記者會交代。余錦基10月底曾經話，賽道途經政府總部，有高官同佢講過咁會阻住特首梁振英同一眾官員出入，要更改路線遷就。消息指，FIA要求各城市嘅政府機關簽署主辦意向書，香港政府冇簽亦都冇遞交，結果香港呢個所謂「亞洲國際都會」，當然冇得搞啦！首站9月13日喺北京揭幕，其餘9站分別喺大馬、烏拉圭、摩納哥、德國同英國等地上演。

同車迷一樣，香港賽車手李英健都嬲到爆，「政府思想守舊，從來都唔認為賽車係體育運動。小型賽車、越野賽車到Formula E通通都唔支持，一味覺得係危險、唔健康玩意。政府一定唔知道新加坡辦F1後，知名度高咗，吸引力大咗。」

政府：地少人多難安排

政府發言人回應我哋查詢時解釋，鑑於香港地少人多，交通繁忙，佢哋要謹慎研究賽道設計、安全要求同工程時間表，務求盡量減輕對駕駛人士及公眾嘅影響。要出年辦有關賽事，時間上極度緊迫，安排及工程亦難做到盡善盡美。佢哋會繼續同主辦機構緊密聯繫，積極研究日後喺香港舉辦嘅可行性喎。

另外，F1明年賽程亦已經落實，會由原先公佈嘅22站變返做19站，南韓站、印度站將會取消，新加入俄羅斯索契站。揭幕戰係3月16日嘅澳洲站，尾站11月23日喺阿布扎比舉行。