轉貼<狗咬狗>

我係分身 · 發表於 2013-10-13 04:15:36

有人o既地方，就有是非。無論彼此o既關係係親人、好友、同事，甚至只係鄰居，只要日常有交流，發生矛盾o既機率就自然存在。所以我哋周不時都會喺報紙上見到公司多年拍擋意見不合拆夥、父母兄弟因小故成陌路，老死不相往來呢啲新聞。

喺社會打滾打年o既成年人，尚且掌握唔到呢啲複雜o既人性，更何況係入世未深o既年輕人呢？話說《文匯報》今日報導，有一位「前學民仔」將自己對前領導人「鋒猴」o既不滿以自拍方式擺上Youtube，實行反轉豬肚。雖然佢呢段充滿「葡萄味」控訴有令人覺得「分手分得太兒戲」o既感覺，但呢位名叫「芒果」o既年輕人對鋒猴搞個人崇拜o既批評又確實唔錯得晒。基本上由舊年反國教進入高潮時開始，無論係鋒猴自己，定係背後有份推波助瀾o既傳媒、政客、「知識份子」，無一唔將「猴哥」o既言論放大再放大，奉為聖言，要全港市民聽佢老點，稍有反對，即被屈成「被洗腦的五毛」；重有教信眾做個「笑佢戇狗怕佢嬲」o既超人死光手勢反國教，翻抄文革群眾舉紅寶書動作，任意踩議員場、圍官員屋企、報細歲數、反口唔認政黨背景通通被傳媒「包容」，一副「罷黜百家，獨尊猴童」咁樣，搞個人崇拜，又豈非如芒果仔所言，係今日o既事！？根本一開始成套大龍鳳已經係要捧佢成為自以為是o既「英雄」了。

今日有前信徒芒果仔因小事醒覺，係好事。希望近日「猴童」為保自己僅餘一丁點信眾而做出種種指鹿為馬，耍賴唔知醜o既低劣表演可以令更多往日撐佢o既市民醒覺，呢件昔日被吹捧為「香港勝在有佢」o既讀書唔成中學生，只係另一件被政治搞到迷失咗自己、自我膨脹到無得救，一心只望靠「反國教」鯉躍龍門投身政界o既投機小混混而已。更遺憾係，呢件猴童被比佢更識算計o既成年老奸巨當做「紙底橫」，用完即棄o既瞄頭近月越發明顯了。難道你哋真係願意繼續成為猴童o既「救命稻草」，唔可以勇敢承認自己當初信錯人，送佢一程，令佢變返普通中學生，做返學生應做的事？救猴一命，實勝造七級浮屠哦。

2013/10/12

以上影片乃youtube提供,與本站無關; 若無法觀看,可查看原網址。

--- 芒果仔自白

http://paper.wenweipo.com/2013/10/12/HK1310120030.htm
--- 前學民成員批黃之峰搏出位