|
|
「魔鬼」賽程 莫耶斯頭痕
英超2013至2014年賽程噚日正式公布，曼聯同埋車路士第2周就相遇，真係好睇過戲，不過紅魔鬼新帥莫耶斯相信就冇咩心情喇，因為佢將會面臨一系列魔鬼賽程，除咗車仔之外，史雲斯、利物浦同埋同市嘅曼城都喺頭5輪出現，呢次真係頭痕喇！
其實英超賽程係比較複雜，首先要避開國際賽檔期、歐聯同歐霸，然後要將同一城市嘅對手分開，唔可以俾佢哋同時喺主場作賽，跟住仲有警方介入，有關當局有權叫球會更改開波時間，甚至日期，避免同其他非足球項目嘅大賽撞期，連節日、政治會議甚至花展都要避。另外，根據英超聯盟規定，每支球隊唔可以連續踢3場作客，所以編英超賽程真係好考功夫。
難度咁高，曼聯都無謂投訴喇，雖然佢哋開鑼日就要作客黑馬史雲斯，然後第2輪喺主場對住由摩連奴領軍嘅車路士，第3輪去晏菲路踢利物浦，第5輪作客死敵曼城，聽到都打冷震，但係賽程編排已成定局，加上莫耶斯新官上任，唔通周圍叫救命咩？死頂都要撐啦！費格遜枝棒唔易接架，相信莫耶斯已經開始頭痕。
開鑼日最強戲碼曼城鬥紐記
至於開鑼日最勁嘅戲碼就係曼城對紐卡素，「藍月亮」嗰邊有柏歷堅尼初嘗英超，「喜鵲」就有堅尼亞呢個麻煩友搞風搞雨，而倫敦雙雄阿仙奴同車路士都幾好彩，前者主場對阿士東維拉，後者亦喺史丹福橋對升班馬侯城，3分照理袋硬，利物浦留守晏菲路對住易帥嘅史篤城亦好穩陣。
講咗咁耐，幾時係開鑼日呢？咪就係8月17號囉，與此同時，英格蘭足總都公布埋2013至2014年足總盃決賽喺明年5月17號開打，即係英超煞科之後一個星期，大家想去英國睇波可以攞定假期。 |
|
在線雷達
發表於 2013-6-20 00:34:58
廣播
置頂
超級提昇
強效提昇
推舊帖
收嗲鳥
油顏色
