又泊錯碼頭陸詩韻未婚夫欠340萬破產

ivanivanfung · 發表於 2013-4-26 03:59:40

今年三月，陸詩韻被拍到同一位「中坑」游汶萊同馬來西亞九日，詩韻回港後即時開記招，話該名「中坑」原來係佢未婚夫，仲要表示夫婚夫係富豪吳銘偉。

諗著今鋪冇死啦，點知有報道指前日（23日）發現詩韻所住嘅西貢匡湖居屋苑巴士站廣告燈箱，貼咗14張追債大字報，唔單止有佢哋兩個嘅相，仲有吳先生嘅個人資料。據知，陸詩韻未婚夫吳銘偉係馬來西亞人，做貿易生意，不過最後生意失敗。08年更告上法庭，吳銘偉被判敗訴，要償還340萬欠債面臨破產。

而陸詩韻微博亦未見佢有新動向，早排佢仲過住少奶式生活，閒時去學整餅，不知過得幾開心，似乎仲未知未婚夫欠債一事。對於被追債，陸詩韻表示全不知情，被問到未婚夫欠債340萬，佢封口唔答，只係話自己好唔開心。唔知一陣佢又會唔會開番個記招呢？

詩韻出道至今工作唔多，憑住34C上圍同埋靚樣，成功俘虜唔少男士，位位都係城中富豪，不過俘虜到唔代表可以開花結果啵。

07年1月，佢同大過自己14年嘅曾文能去日本同遊3日，盛傳最終被周汶錡撬牆腳，一年玩完。

08年初，同有「廉署剋星」之稱嘅律師林炳昌喺中環約會曝光，隨住林嘅官司敗訴，被律師會釘牌，佢哋嘅感情亦無疾而終。

08年尾，有報道指佢同身家過十億嘅「油王」朱明拍拖，不過兩個月後，陳法蓉硬撬牆腳，其後朱明亦因債務纏身，被內地追7億人仔，最後要改頭換姓避一避。

10年，有傳因合作關係而會同「少年食神」林澄光(Michael)撻著，少年食神表示自己身家過億，不過緋聞傳傳吓就冇咗事。

一心嫁個有錢人嘅詩韻諗住今次冇死啦，據知空心老倌吳銘偉經常送鑽戒同手袋，而對方表示自己喺大馬有好多物業，同政府合作做生意，不過一齊之後開始懷疑對方嘅財政，因為不時聽到有人追數，而知情人透露，今次陸詩韻都打定輸數！