港甲壯舉煞科日打5場

man36951

港甲壯舉煞科日打5場

今屆甲組聯賽尚有四輪賽事便煞科，但榜前及護級形勢爭持相當激烈，衛冕的傑志落後榜首的南華僅3分，未知鹿死誰手。

除聯賽前四球隊外，其餘六支球隊仍在降班漩渦掙扎，可能要鬥至最後一輪賽事才能決定冠軍誰屬及哪一隊會護級失敗，因此，足總構思在最後一輪聯賽將破天荒同時異地上演5場聯賽，以保障各爭標及護級隊⋯⋯伍於公平環境下作賽，此項「壯舉」一旦成事，不但是香港足球史上的一項「創舉」，也為港甲邁向新里程，為未來成立的新職業聯賽接軌。

由於甲組會要求在最後一輪聯賽盡量安排同一時間開波，故足總在編排本屆甲組聯賽賽程只至第17周聯賽，最後一輪則未有公布。足總總幹事袁文川承認，會方正朝着煞科日聯賽同時開波的方向而努力，並已着手聯絡場地方面，但五場聯賽是否需要同時開波，還要視乎未來四周聯賽的發展而定。最後一輪賽事已預留了5月4及5月5日兩個賽期。

man36951

man36951

西門估錯又如何分析系列之
港甲護級形勢4

太陽飛馬 – 飛唔飛得起？

⋯⋯ 聯賽排名：7
有利因素：大變陣後實力提昇；對公民時有主場之利
出事因素：太唔穩定；對賽無明顯優勢
未來四場：（客）大埔、（主）公民、（主）傑志、（客）流浪

簡評：
飛馬依家贏過三場聯賽，分別係兩勝屯門及首循環贏晨曦。首循環對大埔領先兩球下被迫和，之後對公民、傑志同流浪都輸波而回。如果次循環都係咁嘅戰果，都咪話唔大件事。雖然咁講好似有少少唔啱，因為下半季球隊大變身之後，整體實力真係高咗。白鶴打番最擅長的防中，加上摩域治係後面真係好穩，防守力有改善，只差龍門畀唔到信心大家。不過要講大鑊，唔識入波問題仲大。唔計大炒屯門一場，其餘四場入三球，一球係十二碼，一球係徐德帥罰球省中人，一球係鄧景煌撞射龍門甩手入。話就話試過十二碼宴客同中柱中楣，不過呢個數字始終都唔多理想，成班前鋒把握力都唔多特別。雖然個人唔多想飛馬出事，不過以佢地攻擊力去睇，唔拿拿臨搵方法改善就真係隨時出事。

關鍵先生：麥基（上半季防守唔得，好彩有佢頂住。依家防守攪掂，就睇佢幾時回勇啦！）

man36951

和富大埔 – 捧盃降班？
⋯⋯
聯賽排名：8
有利因素：賽程真係有利；拎完銀牌唔同晒
出事因素：一直放唔甩對手；後防失波太多
未來四場：（主）飛馬、（主）南區、（客）晨曦、（客）橫濱

簡評：
我唔信Lulu捧邊度死邊度，你估呢度係專講外國波的波波池呀？和富大埔上半季失分太多，不過捧完銀牌之後，成隊波係唔同晒。唔可以否認球隊係上番力的，近兩場對流浪同傑志搶到分走，都算交到功課。問題係自己搶到分之後，同級對手都搶到分，危機暫時都未解除。而且佢地場場聯賽都有失波，防守表現始終唔算好理想。依家成日要靠黑雙煞頂住，加埋安達係中場幫手做到嘢，成績先一路唔錯，是旦一個出事都好大影響。好就好在之後幾場都算易食，只要唔好無啦啦做送禮勤，照計無問題掛。

關鍵先生：艾力士與安基斯（佢地兩個極可能是地上最強的MIB。）

tuvwxyz

又要學英超,邊有禁多球迷?

man36951

晨曦 – 眾望所歸？

聯賽排名：9
⋯⋯ 有利因素：張春暉真係好勁；近排有運
出事因素：貝奧加巴利；亞協；未對傑志同南華
未來四場：（客）傑志、（客）流浪、（主）大埔、（客）南華

簡評：
我明好多球迷都想晨曦死，不過大眾念力唔在我考慮之列，Sorry！唔可以否認晨曦表現有少少進步，全因為後防有張春暉，係守得好咗。贏公民對南區兩場，都係靠神貓近乎神級的演出先搶番三分。問題係「唔怕神一樣的對手，只怕豬一樣的隊友」，一對前鋒都係得啖笑。貝奧識唔識踢波都係問題，而巴利同隊友間的黑面指數有增無減，究竟可以點入波，唔通真係下下靠死球？仲要分心踢亞協，話就話出事機會唔大，不過飛來飛去鐵打都會睏，一個唔好彩主力受埋傷就真係拜神都唔靈了。前途的確唔多樂觀，唯有靠自己啦。

關鍵先生：張春暉（晨曦依家拎十二分，其中十分係靠佢撲番嚟。係睇佢幾時後上入波咁解。）

man36951

公民 – 大步檻過？

聯賽排名：10
⋯⋯ 有利因素：賽程唔難應付；之前幾場表現唔差
出事因素：近排真係當黑；得番一場主場
未來四場：（客）屯門、（客）飛馬、（客）橫濱、（主）傑志

簡評：邊有諗過公民依家會排包尾。不過近幾場真係黑到無人有，對晨曦同南區都因為對手龍門上身，守南華又因為一個錯誤出事，連續幾場一分都無的確慘情。不過公民之後幾場唔算難應付，今個星期對極殘陣的屯門，照計可以勝番場振軍心。信心番嚟之後，之後兩場要搶分都唔係好難。只要生生性性，應該可以無事。唯一係怕黑到連對屯門都……

關鍵先生：廸天奴、蘇來強（阿奴幾重要唔駛講，係睇佢會唔會一命救全家。來強如果打出水準，中前場組織力係會好番好多。）

yamamoto

出發點係好但冇可能做到
本地波邊有咁多球迷
除左南華傑志外
其他球隊比賽根本冇可能過千
同一日比賽咁多場
我驚戲碼弱既比賽得好少人睇