送給滿口酸葡萄的股民 - 股榮

見性成佛 · 發表於 2013-2-3 08:40:29

http://hkm.appledaily.com/detail ... &category=daily

《伊索寓言》故事，一隻肚餓的狐狸看見架子上掛着一串串葡萄，垂涎欲滴，可是摘不到，只好悻然離開，抱怨說：「葡萄是酸的。」上個星期，《蘋果》一則「打工仔炒股五個月　4萬賺150萬」報道，反應頗為負面，認為教壞人、助長炒風、Jackson只是死好彩。看到部份讀者及網友意見，股榮只能說，又是滿地酸葡萄。

肯付出　開市即執靚貨
Jackson不足五個月贏36倍，好彩是肯定的，但就不能抹煞別人的努力及膽識。J君講，成功因為勤力做功課，大家六點仲瞓到成隻豬的時候，他已經起身刨新聞、鋤業績。股票市場充滿機會，亦有無數陷阱，如果經常炒出炒入，對宏觀經濟及個股消息，都要全盤透徹。

早起的鳥兒有蟲吃，這點是真的。股榮每逢周一早起輪班做即時新聞，睇港交所通告、掃大陸網站，辛苦但值得。尤其國策消息，外資芬佬仍等人繙譯、發現是好消息，然後始識掃貨之際，大家如果肯付出，已經可以一開市執靚貨。

人蠢還可以教，但人懶就冇藥醫。電台或電視上經常聽到有人問，點解呢隻升得咁勁、呢隻無端端被洗倉。股價唔會無啦啦大升大跌，可能是有收購、可能是有大行唱好，亦可能是業績差勁，如果不求甚解飛撲入場，贏錢係好彩、輸錢係應份。連最基本功課資料都懶得搵、只識聽冧把、抄功課，唔輸至奇。

「有早知，冇乞兒」。有人認為J君五個月前入市，只是適逢歐央行宣佈無限買債、繼而美國放水推QE3。

然而，這些消息並非Jackson收到、全世界所有人都接收到。當時仍有大班所謂專家，認為歐債問題未解決，美國放水冇用。結果大部份人猶豫之時，J君睇準這個浪乘風而去，旁觀者不清，只懂馬後炮。

事實上，股市過去五個月反覆推進，累積升幅25%，以幅度計未算狂牛。統計由去年9月至今年1月底止，市值10億元以上、升幅超過100%的股份，只有45隻，50%至一倍以內升幅的港股有129隻，但同期下跌的股份，還有117隻，其間並非如想像中「easy執」。

識得守　先係真正高手
在此並非要為J君護航，實際上，其快樂旅程亦可能暫時到此為止，用數萬炒贏過百萬，身邊見過不少成功例子，但由100萬進一步向上突破，難再靠槓桿谷大，靠炒股變千萬富豪可謂鳳毛麟角。未來日子識得守先叫真正高手。

人人都想炒出第一桶金，但機會來到卻畏首畏尾，見到人成功眼紅，詛咒其慘淡收場，這種心態最可悲。

下次批評人時，請捫心自問，你有沒有付出過努力，別人有賺一倍的勇氣，你有嗎？自己做不到就懷疑別人，注定難成大器。

巴拉飛 · 發表於 2013-2-4 02:31:51

我認為J君有做過功課,但運氣也佔不少。
試想,只計麗新系列的股票,平咗幾多年?我認識一位持麗新孖寶(191、1125)的資深投資者,都記唔起買咗幾耐,慶幸是呢兩只佢也有得賺,191更是大發。
所以,就算好身手、好眼光、良好的心理質素;但要短期內獲此驚人的變倍回報,總不能不牽涉運氣。

另外,股榮謂其:「每逢周一早起輪班做即時新聞、睇港交所通告、掃大陸網站，辛苦但值得。尤其國策消息，外資芬佬仍等人繙譯、發現是好消息，然後始識掃貨之際，大家如果肯付出，已經可以一開市執靚貨。」

哈哈,如此蜻蜓點水式做功課...貧尼只可祝股榮先生好運矣。