轉載 - 青的疑惑

見性成佛 · 發表於 2013-1-17 22:49:39

http://blog.yahoo.com/_B4PDDA4NJB3NVUAHKNQL43B5Q4/articles/66758

每次股市高潮，均有很多對股票從未攝獵的新手入市，正所謂「中環擦鞋仔講股票，大市離頂不遠」。當然這是七十年代的讀法，今時今日財經資訊泛濫，「小朋友都講股」就差唔多，因此也不宜如此武斷地說股市因而見頂。但當細價股禾雀亂飛，無厘頭問到人「霖把」(number)都有錢賺時，自然很多平時無留意股市的人入市。在老手的角度，可能已經忘記了自己做初哥時是如何睇股市，或者等筆者為大家回味一下。

有些電視劇會有這樣的情節：演員或者會周圍同人講有內幕消息，或者會去問人「囉料」。正所謂「免費的消息是最貴的消息」，消息傳到入圍外人的耳，根本就唔會係內幕，而係煙幕。而且一隻股票的升跌，並不需要消息，消息根本就唔應該係入市或出市的理由。偏偏每多報章的專欄係明示暗示消息，讀者也樂此不疲，佢地可能將買賣股票當左買馬或者六合彩。

又係講電視劇，問完貼士之後，多數都會講埋升幅，「嘩！可以賺兩三成嫁！」或者「聽講話升兩三個開」。以上兩個預期升幅是不設實際的，如果出盡八寶都只係兩三成，唔該收聲，兩三成的波幅在股市中是很少意思的。如果話係兩三個開，又係太大想頭，美國股神畢菲特每年平均百份之廿幾左右，散戶新手想轉眼間賺一兩倍，根本就唔係正常操作，紅色股又好，科網股又好，澳門股又好，踢上兩三倍唔係比散戶賺錢，而係想散戶用兩三倍的代價買入股票，而且散戶一般係貪心不願出貨的，就算真係捉到升幅，最終也因為不肯收割而見財化水。

有些老手私下同筆者講，個市派貨派到咁明顯，個圖擺到明跌破上升軌，點解ｄ人仲諗住入貨？對不起，初哥散戶是不識睇圖的，亦唔明白股市係收集派發的循環，更加唔明股市升係引發派發，仲會以為庄家炒上係為左散戶賺錢。睇圖唔見趨勢，當然只當係升升跌跌，一係就迷茫，一係就當係買大細咁買升跌。

新手亦唔知道，股票係有數計的，一隻股票「偏低」，並唔係佢由高位跌左幾多叫做偏低，而係從每股收益、派息、增長率等等計算出來的。所以大家見到ｄ「撈底王」教人跌左幾多搏反彈，而無視一隻股票大跌往往係因為基本因素轉壞，或者是行業正在萎縮，或者根本就係概念破滅後被人遺棄。

新手更唔知道，股票不一定係同步上升的，才會有「追落後」、「搏炒同類股」這類謬論。正如一群人行山，年富力強會越行越遠，老弱傷殘會越行越後，如果往往去選擇看似偏低、落後的弱勢股，望住ｄ強勢股越行越遠。但係新手的心態就係：買落後股、偏低股係「著數」過買升幅已大的股票。因為貪著數而忘記價值所在。

風險、賺蝕等概念，新手也是很模糊的。借孖展，用衍生工具等，佢地淨係睇到賺果時會賺多好多，從來唔去諗如果失手咁點算？又有時因為注碼的絕對金額較細而無視風險，「果幾千蚊，輸左咪當交學費囉！」，一個一萬蚊的投資／投機輸四千蚊，損失並唔係幾四千蚊，而係本金的40%，他日有十萬蚊就輸四萬，有一億就輸四千萬！損失率係唔會因為金額細而變細，今日注碼少時唔控制風險，他日炒大舊錢輸得仲勁！

還有一樣最有趣而可悲的現象，新手散戶們為甚麼往往發現自己買了最高的價位，賣了最低的價位，呢頭買果頭跌，果頭賣果頭升？這便涉及強者與弱者的問題，股市上道行較高的人，是不會搶價買賣，掛出一個偏離「合理」價太多的買賣價位。這裏所謂的「合理」並不是絕對值，而是針對市況估計出來的，或者在關鍵價位上下設定策略保護自己。所以市場上的強者，贏會贏得比弱者多，輸會輸得比弱者少，進退有道。反而新手散戶養成「高追」、「撈底」、「坐貨」、「溝貨」等惡習，不單在買賣時機上失策，亦未能把注碼與風險之間維持平衡，自然輸多羸少。

新手散戶也有一種常犯的陋習，就係將別人或者一己的想像當成事實，明明大市下跌，Ａ先生話係震倉，Ｂ先生話係大戶收貨，Ｃ先生話係洗倉，Ｄ先生話係挾好倉。股市下跌就是下跌，上升就是上升，無必強行要找一個理由。市場的升跌是由無數的因素集合而成，升跌只是這些因素的角力，沒有一個或幾個單一理由可以令股市變動，加息令投資成本上升，但是加息又顯示多人借錢經濟擴張，加息又可以吸引熱錢流入，加息又可以話顯示資金流出需要阻止，一個理由已經可以有咁多變化，簡單一句「震倉」、「挾倉」又豈能說明甚麼？偏偏有些人就喜愛這些似是而非的理由，甚至自我創作一些更離奇的觀點，然後當做事實那樣看待，長期這樣麻醉自己的腦袋，只會影響分析及思考能力。

新手最最最大的謬誤，就係以為投資無得學，所以其他散戶就係同佢地一樣手空腦空，賺到錢只係好彩吧！大戶就係大石責死蟹、造市、搶散戶錢。根本上投資市場，唔係你死就係我亡，弱者犧牲，強者坐大，自己唔去充實知識、累積經驗，反而滿足於待宰羔羊的角色，甚至稍經挫折便抱著放棄的態度。如果跌入這種世界觀上，則永離成功之道。