Alex醉攰冇洞房,江欣燕講粗口

突擊高達 · 發表於 2012-11-14 01:34:15

杜德偉（Alex）前日迎娶李曉冰（Ice），梁家輝、張學友及梁朝偉等紅星好友雲集婚宴High到爆，狂歡過後醉態百出，葉童幾乎碌落樓梯、江欣燕醉到爆粗。新郎哥杜德偉狂歡舉杯，但堅稱冇醉，只狂呻因太攰冇力洞房。

於前日「光棍節」迎娶26歲嫩妻Ice的50歲杜德偉，晚上於深灣遊艇會設宴。圈中人緣甚佳的他，有不少紅星到賀。日間於註冊時一對新人喜極而泣，連與Alex同齡的外父亦感動落淚。至晚宴時新人明顯輕鬆不少，除了切蛋糕外，又扭腳擰髻起舞，氣氛熱烈！

梁家輝變可愛教主

眾人見證老友榮升老襯非常開心，舉杯不停，江欣燕、梁家輝、曾志偉及葉童等更恍如去「醉貓宴」。約晚上11時，帶醉的梁家輝與穿透視裝的太太最先離席，他單眼又擺可愛V手勢，向鏡頭高呼：「好開心呀！」而林利與呂方亦陸續離開，前者成龍上身擺出V字手勢；葉童飲到面紅紅，與夫婿落樓梯時跣腳嚇到O嘴，更與有醉意的黃家強太太同樣在登車時疑似走光。

要數「醉」佳演繹藝人，則非江欣燕莫屬！酩酊大醉的她玩到凌晨1時許由夫婿吳積遜及兩名大漢「拖」住走，落樓梯時仆一仆的她突然爆粗︰「路都睇唔到，×你老母！」當望到記者閃光燈後再爆粗︰「唔好影，×你老味！」夫婿幾經辛苦才將她「塞」上車，她卻「楊怡上身」伏低頭，已面紅紅的吳積遜雖忙照顧爛醉妻，仍保持笑容說︰「唔該！拜拜！」

互讀心聲感動到喊

一對新人於約凌晨1時受訪，Alex稱忙招呼賓客「飲得唔多」，對於志偉近12時才到，他說︰「一早通知佢，但佢要去剛晶婚宴所以冇應承實，佢嚟到好多謝佢。」提到與太太互讀心聲環節，他說︰「我哋互寫一篇文畀對方讀，內容大家都唔知，讀嗰時有喊。」而昨日接受電話訪問，對於江欣燕戥他高興至醉爆失儀，他說︰「佢開心啫！我尋日冇乜點醉。」但笑言被鍾鎮濤「睇死」未有洞房︰「佢話以前朋友搞結婚都冇洞房，我尋日同老婆都好攰，所以都冇。」