Super Girls 着制服洗宅男腦

eu2 · 發表於 2012-10-19 18:08:30

Super Girls着制服洗宅男腦

模特兒出身的女子跳舞組合Super Girls（SG）出道近一年已密密接job，最近更接拍廣告開拓財路，

誓爭做新一代吸金女團，五女更明言想憑廣告歌洗宅男腦，為即將推出的處女碟造勢。

江若琳師妹、女子跳舞組合Super Girls五位青春成員Aka、Cheronna、Yanny、Heidi及Jessica由模界踩入樂壇，靠騷長腿迷死宅男，五女近期密密做揚言要搵第一桶金，果然獲得信用卡公司AEON睇中，以組合名義拍攝廣告，為目標跨出一大步。五女當日更得到客戶的重視到拍攝現場探班，隊長Aka開心到爆︰「好感謝客戶賞識，今次酬勞幾滿意，希望可再接更多唔同工作，哈哈，我哋五個要做吸金女團。」

空軍施誘
拍攝當日眾女大玩制服誘惑，其中空軍制服最令她們印象深刻，Yanny笑言要做個索爆女機師︰「好多女仔都想做空姐，但我就想考空軍，因為啲制服一樣咁靚。」Heidi則笑言造型定迷倒男粉絲，更打趣指要用這個造型箍實男友：「個造型幾吸引，其他女仔都可以試吓咁着去吸引異性。」
至於廣告歌是她們的主打歌《話愛就愛》，Cheronna直言可藉此宣傳下月推出的處女碟，順帶變成宅男的洗腦歌：「唔介意變咗一首洗腦歌，希望透過唔同嘅平台，畀更多嘅人聽到。」